കവി പി കെ ഗോപിക്ക്‌ സാഹിത്യ അക്കാദമി പുരസ്‌കാരം സമർപ്പിച്ചു

   കോഴിക്കോട്: കവിയും ഗാനരചയിതാവുമായ പി കെ ഗോപിക്ക്‌ കേരള സാഹിത്യ അക്കാദമി പുരസ്‌കാരം സമർപ്പിച്ചു. അക്കാദമി ഭാരവാഹികളുടെയും സാഹിത്യ സാംസ്കാരിക പ്രവർത്തകരുടെയും സാന്നിധ്യത്തിൽ അക്കാദമി ​വൈസ് ചെയർമാൻ അശോകൻ ചരുവിലാണ്‌ പുരസ്‌കാരം നൽകിയത്‌.

   സമഗ്ര സംഭാവന യ്‌ക്കുള്ള പുരസ്‌കാരമാണ്‌ വീട്ടിൽ നടന്ന ചടങ്ങിൽ സമ്മാനിച്ചത്‌.മലയാള കാവ്യപാരമ്പര്യത്തിന്റെ മഹനീയ തുടർച്ച നിലനിർത്തി തന്റേതായ രീതിയിൽ മുന്നോട്ടുപോകുന്ന കവിയാണ് പി കെ ഗോപിയെന്ന് അശോകൻ ചരുവിൽ പറഞ്ഞു. നിലപാടുകളിൽ മാനുഷിക ബോധമുള്ള, രോഷം കൊള്ളിച്ച, കരയിപ്പിച്ച, ചിന്തിപ്പിച്ച കവിയാണ് പി​ കെ ഗോപിയെന്ന് സിപിഐ സംസ്ഥാന സെക്രട്ടറി ബിനോയ് വിശ്വം പറയുകയുണ്ടായി.

   സാഹിത്യ അക്കാദമി നിർവാഹക സമിതി അംഗം എം കെ മനോഹരൻ അധ്യക്ഷനായി. അക്കാദമി ഭരണസമിതി അംഗം ഡോ. മിനിപ്രസാദ് സംസാരിച്ചു. സെക്രട്ടറി സി പി അബൂബക്കർ സ്വാഗതവും പ്രോഗ്രാം ഓഫീസർ കെ സുനിൽ നന്ദിയും പറഞ്ഞു.