ബുള്ളറ്റ് സ്റ്റാർട്ട് ചെയ്യുമ്പോൾ തീപിടിച്ച് കത്തി നശിച്ചു

പാറക്കടവ് : പാറക്കടവ് സ്വകാര്യ ക്ലിനിക്ക്ന് സമീപം ബുള്ളറ്റ് ബൈക്കിന് തീപ്പിടിച്ചു. ഇരിങ്ങണ്ണൂർ സ്വദേശി സൗപർണികയിൽ ഹരിദാസിന്റെ ബൈക്കിനാണ് തീപ്പിടിച്ചത്.ഹരിദാസനും കൂടെയുണ്ടായിരുന്ന ഭാര്യയും അത്ഭുതകരമായാണ് രക്ഷപ്പെട്ടത്. ഇന്ന് ഉച്ചയ്ക്ക് ഒരുമണിയോടെയാണ് സംഭവം.

     ഹരിദാസനും ഭാര്യയും ആശുപത്രിയിലെത്തി തിരിച്ച് പോകുന്നതിനായി ബൈക്ക് സ്റ്റാർട്ട് ചെയ്യുമ്പോഴാണ് തീ ഉയർന്നത്. നിമിഷ നേരം കൊണ്ട് തീ ആളിപ്പടർന്നു. സമീപത്ത് ആളുകൾ ഉണ്ടായിരുന്നെങ്കിൽ അവർക്ക് തീ അണയ്ക്കാൻ കഴിയുമായിരുന്നില്ല. സംഭവം നടന്ന ഉടൻ ഫയർ സ്റ്റേഷനിൽ വിവരം അറിയിച്ചു. നാദാപുരം ഫയർ &റെസ്ക്യൂ സ്റ്റേഷൻ ഓഫീസർ വരുൺ. എസ്, സീനിയർ ഫയർ ഓഫീസർ ഐ ഉണ്ണികൃഷ്ണൻ എന്നിവരുടെ നേതൃത്വത്തിൽ ഫയർ ഫോഴ്സ് യൂണിറ്റ് സ്ഥലത്തെത്തി തീ അണക്കാനുള്ള ശ്രമങ്ങൾ ആരംഭിച്ചു.

       അഗ്നിശമന സേന പ്രവർത്തകരോടൊപ്പം നാട്ടുകാരും തീ അണയ്ക്കാൻ സഹായിച്ചു. ഷോട്ട് സർക്യൂട്ടാണ് തീപ്പിടത്തിന് കാരണമെന്നാണ് പ്രാഥമിക നിഗമനം. ഭാഗ്യം കൊണ്ടാണ് ദമ്പതികൾ അപകടത്തിൽ നിന്നും രക്ഷപ്പെട്ടത്.