കോവിഡ് വാക്സിൻ പിൻവലിച്ച് ആസ്ട്രസെനക്ക
പാര്ശ്വഫലങ്ങളുണ്ടെന്ന പരാതികള് വ്യാപകമാകുന്നതിനിടെയാണ് നടപടി
ഡൽഹി: പാര്ശ്വഫലങ്ങളുണ്ടെന്ന പരാതികള് വ്യാപകമാകുന്നതിനിടെ കോവിഡ് വാക്സിൻ പിൻവലിച്ച് നിര്മ്മാണ കമ്പനിയായ ആസ്ട്രസെനക്ക. വാക്സിൻ്റെ ഉത്പാദനവും വിതരണവും പൂര്ണമായി അവസാനിപ്പിക്കുന്നതായാണ് കമ്പനി അറിയിച്ചത്. മാര്ക്കറ്റില് അവശേഷിക്കുന്ന സ്റ്റോക്ക് തിരിച്ചെടുക്കാനും തീരുമാനമായിട്ടുണ്ട്.
യു.കെയില് നിന്നാണ് 51 പേര്ക്ക് ആരോഗ്യപ്രശ്നങ്ങളുണ്ടായി എന്ന പരാതി ആദ്യമായി ഉയര്ന്നുവന്നത്. ഇതിന് പിന്നാലെ വാക്സിന് പാര്ശ്വഫലങ്ങളുള്ളതായി കമ്പനി തന്നെ യു.കെ. ഹൈക്കോടതിയില് സമ്മതിക്കുകയായിരുന്നു. ഇന്ത്യയില് ഏറ്റവുമധികം പേര്ക്ക് നല്കിയതും കമ്പനിയുടെ കൊവിഷീല്ഡ് വാക്സിൻ ആണ്. കനത്ത ആശങ്കയാണ് ഇത് ഇന്ത്യയിലും സൃഷ്ടിച്ചത്.
അതേസമയം, പാര്ശ്വഫലങ്ങള് ഉള്ളതുകൊണ്ടല്ല വാക്സിൻ പിൻവലിക്കുന്നതെന്നും വളരെയധികം വാക്സിനുകള് മാര്ക്കറ്റിലുള്ളതിനാൽ തങ്ങളുടെ വില്പന കുത്തനെ കുറഞ്ഞുപോയെന്നും അതിനാലാണ് പിൻവലിക്കുന്നതെന്നാണ് കമ്പനിയുടെ വിശദീകരണം.