പുഴുവരിച്ച നിലയിൽ കണ്ടെത്തിയ വയോധിക മരിച്ചു
ഇന്നലെ പ്രത്യേക മെഡിക്കൽ സംഘം സ്ഥലത്തെത്തി ചികിത്സ നൽകിയിരുന്നു
തൃശൂർ: പുഴുവരിച്ച നിലയിൽ കണ്ടെത്തിയ വയോധിക മരിച്ചു. മലക്കപ്പാറ വീരൻകുടി ഊരിലെ കമലമ്മ പാട്ടിയാണ് ഇന്ന് രാവിലെ മരിച്ചത്. 94 വയസ്സായിരുന്നു. ഇന്നലെ പ്രത്യേക മെഡിക്കൽ സംഘം സ്ഥലത്തെത്തി ചികിത്സ നൽകിയിരുന്നു.
വാർദ്ധക്യസഹജമായ അസുഖങ്ങൾക്കൊപ്പം പക്ഷാഘാതം പിടിപെട്ടായിരുന്നു കമലമ്മ പാട്ടി അവശനിലയിലായത്. ഇതിനിടയിൽ ശരീരത്തിൽ വ്രണങ്ങൾ രൂപപ്പെടുകയും പുഴുവരിക്കുകയുമായിരുന്നു. ആരോഗ്യവകുപ്പിനെയും ട്രൈബൽ വകുപ്പിനെയും ആരോഗ്യസ്ഥിതി അറിയിച്ചെങ്കിലും ഇടപെട്ടിരുന്നില്ല.
എന്നാൽ ഇന്നലെ രാവിലെ മന്ത്രി കെ രാധാകൃഷ്ണനും കളക്ടറും ഇടപെട്ട് മെഡിക്കൽ സംഘത്തെ ഊരിലേക്ക് അയക്കുകയായിരുന്നു. ഇവർക്കാവശ്യമായ ചികിൽസ നൽകി ആശുപത്രിയിൽ പ്രവേശിപ്പിക്കാനും മന്ത്രി കെ രാധാകൃഷ്ണൻ നിർദേശിച്ചിരുന്നു.