സംസ്ഥാനത്ത് മൂന്ന് ജില്ലകളിൽ ഉയർന്ന താപനില യെല്ലോ അലേർട്ട്

കോഴിക്കോട്: സംസ്ഥാനത്ത് ചൂട് കൂടും. മൂന്ന് ജില്ലകളിൽ ഉയർന്ന താപനില മുന്നറിയിപ്പ് പ്രഖ്യാപിച്ചു. കോട്ടയം, കോഴിക്കോട്, കണ്ണൂർ ജില്ലകളിലാണ് യെല്ലോ അലേർട്ട് പ്രഖ്യാപിച്ചത്. 2 മുതൽ 3 ഡിഗ്രി സെൽഷ്യസ് വരെയാണ് താപനില ഉയരുക.

        കനത്ത ചൂടിന് ആശ്വാസമേകി ഏപ്രിൽ മാസമവസാനത്തോടു കൂടി സംസ്ഥാനത്തെ വിവിധ ഭാഗങ്ങളിലായി മഴ ലഭിച്ചെങ്കിലും ചൂട് വീണ്ടും കനക്കുമെന്നാണ് കാലാവസ്ഥാ നിരീക്ഷണ കേന്ദ്രത്തിന്റെ മുന്നറിയിപ്പ്.

        കോട്ടയം ജില്ലയിൽ 35 വരെയും കോഴിക്കോട്, കണ്ണൂർ ജില്ലകളിൽ 36 വരെയും താപനില ഉയർന്നേക്കാമെന്നാണ് മുന്നറിയിപ്പ്. നിലവിൽ അനുഭവപ്പെടുന്നതിനേക്കാൾ 2 മുതൽ 3 ഡിഗ്രി സെൽഷ്യസ് വരെ കൂടുതലാണിത്. ഈ ജില്ലകളിലെ മലയോരപ്രദേശങ്ങളൊഴികെ എല്ലായിടത്തും ചൂട് അനുഭവപ്പെടുമെന്നാണ് മുന്നറിയിപ്പ്.