ശമ്പളവിതരണം; കെ.എസ്.ആര്‍.ടി.സി ബി.എം.എസ്. യൂണിയൻ പണിമുടക്ക് ഇന്ന് അർദ്ധരാത്രി മുതൽ
സമരത്തിൻ്റെ ഭാഗമായി നാളെ സെക്രട്ടറിയേറ്റ് മാർച്ചും സംഘടിപ്പിക്കും
NDR News
07 May 2023 07:43 PMതിരുവനന്തപുരം: ശമ്പളവിതരണം വൈകുന്നതിൽ പ്രതിഷേധിച്ച് കെ.എസ്.ആര്‍.ടി.സി. ബി.എം.എസ്. യൂണിയൻ പണിമുടക്ക് സമരം ഇന്ന് അര്‍ധരാത്രിമുതല്‍. നാളെ രാത്രി 12 മണിവരെയുള്ള സമരം ബസ് സര്‍വീസുകളെ ബാധിച്ചേക്കുമെന്നാണ് സൂചന. ആരെയും നിര്‍ബന്ധിച്ച് പണിമുടക്കിന്‍റെ ഭാഗമാക്കില്ലെന്ന് യൂണിയന്‍ നേതാക്കള്‍ അറിയിച്ചു. സമരത്തിൻ്റെ ഭാഗമായി നാളെ സെക്രട്ടറിയേറ്റിലേക്ക് പ്രതിഷേധ മാര്‍ച്ചും നടത്തും.
ശമ്പളവിതരണം പൂര്‍ത്തിയാകും വരെ തുടര്‍സമരങ്ങളുണ്ടാകുമെന്ന് തൊഴിലാളി യൂണിയന്‍ നേതാക്കള്‍ അറിയിച്ചു. ഇന്നലെ സി.ഐ.ടി.യുവും ഐ.എന്‍.ടി.യു.സിയും സംയുക്തസമരം നടത്തിയിരുന്നു.
അതേസമയം, പണിമുടക്കി സമരം നടത്തുന്നവരുടെ ശമ്പളം പിടിക്കുമെന്ന് ഗതാഗതമന്ത്രി ആന്‍റണി രാജു പറഞ്ഞു. തനിക്കെതിരായ സി.ഐ.ടി.യു. നേതാക്കളുടെ ആരോപണങ്ങളെ വ്യക്തിപരമായി എടുക്കുന്നില്ലെന്നും അദ്ദേഹം വ്യക്തമാക്കി.
