തൊഴിലിടങ്ങളില് ശിശു പരിപാലന കേന്ദ്രങ്ങളൊരുങ്ങുന്നു
പദ്ധതിയുടെ ഉദ്ഘാടനം ആരോഗ്യമന്ത്രി വീണാ ജോര്ജ് നിര്വഹിക്കും
തിരുവനന്തപുരം: സംസ്ഥാനത്തെ തൊഴിലിടങ്ങളില് ശിശു പരിപാലന കേന്ദ്രങ്ങൾ ഉടൻ ആരംഭിക്കും. പദ്ധതിയുടെ സംസ്ഥാനതല ഉദ്ഘാടനം ആഗസ്റ്റ് പത്താം തീയതി ബുധനാഴ്ച രാവിലെ 11 മണിക്ക് പി.എസ്.സി. ഓഫീസില് വച്ച് ആരോഗ്യ വനിത ശിശുവികസന വകുപ്പ് മന്ത്രി വീണാ ജോര്ജ് നിര്വഹിക്കും. പി.എസ്.സി. ഓഫീസില് സജ്ജമാക്കിയ ആദ്യ ക്രഷിന്റെ ഉദ്ഘാടനവും മന്ത്രി നിര്വഹിക്കും.
മുലയൂട്ടല് പ്രോത്സാഹിപ്പിക്കുന്നതിൻ്റെയും അതിന് വേണ്ട സൗകര്യങ്ങള് പൊതുയിടങ്ങളില് ഒരുക്കുന്നതിൻ്റെയും ഭാഗമായാണ് തൊഴിലിടങ്ങളില് ശിശു പരിപാലന കേന്ദ്രം പദ്ധതി നടപ്പിലാക്കുന്നതെന്ന് മന്ത്രി വീണാ ജോര്ജ് പറഞ്ഞു. ആദ്യഘട്ടമായി സര്ക്കാര്, പൊതുമേഖല ഓഫീസുകളില് വനിത ശിശുവികസന വകുപ്പിന്റെ ആഭിമുഖ്യത്തില് ഈ വര്ഷം 25 ക്രഷുകളാണ് ആരംഭിക്കുന്നത്. പദ്ധതിക്കായി 50 ലക്ഷം രൂപയാണ് അനുവദിച്ചത്. നാഷണല് ക്രഷ് സ്കീം അനുസരിച്ച് ശിശുക്ഷേമ സമിതി മുഖേനയാണ് ക്രഷ് പ്രവര്ത്തിക്കുക.
ക്രഷുകളിൽ ആവശ്യമായ ഫ്രിഡ്ജ്, വാഷിംഗ് മെഷീന്, ഗ്യാസ് സ്റ്റൗ, ഗ്യാസ് കണക്ഷന്, ശിശു സൗഹൃദ ഫര്ണിച്ചറുകള്, പാചകത്തിനുള്ള പാത്രങ്ങള്, ബ്രെസ്റ്റ് ഫീഡിംഗ് സ്പേസുകള്, ക്രാഡില്സ്, ബേബി മോണിറ്ററിംഗ് ഉപകരണങ്ങള്, മെത്ത, കളിപ്പാട്ടങ്ങള്, ബെഡ്ഷീറ്റ്, പായ, ബക്കറ്റ്, മോപ്പുകള്, മറ്റ് ക്ലീനിംഗ് ഉപകരണങ്ങള്, ഷീറ്റുകള് എന്നിവ വാങ്ങുന്നതിന് ആവശ്യമായ തുക ജില്ല വനിത ശിശുവികസന ഓഫീസര്മാര്ക്ക് അനുവദിച്ചിട്ടുണ്ട്.
തിരുവനന്തപുരം ജില്ലയിലെ കിന്ഫ്ര ക്യാമ്പസ്, വെള്ളായണി കാര്ഷിക സര്വകലാശാല, ആലപ്പുഴ ജില്ലയിലെ കൃഷ്ണപുരം പഞ്ചായത്ത്, എറണാകുളം കളക്ടറേറ്റ്, പാലക്കാട് ചിറ്റൂര് മിനി സിവില് സ്റ്റേഷന്, കോഴിക്കോട് കളക്ടറേറ്റ്, വയനാട് കല്പ്പറ്റ സിവില് സ്റ്റേഷന്, കാസര്ഗോഡ് ജില്ലയിലെ നീലേശ്വരം ബ്ലോക്ക് പഞ്ചായത്ത് എന്നിവിടങ്ങളിലും ആദ്യ ഘട്ടത്തിൽ ക്രഷുകൾ സ്ഥാപിക്കുന്നത്.