ഭാര്യയെ ഭർത്താവ് വീട്ടിൽ കയറി വെട്ടി പരിക്കേൽപ്പിച്ചു

വടകര: ചെമ്മരത്തൂരിൽ ഭാര്യയെ ഭർത്താവ് വീട്ടിൽ കയറി വെട്ടി പരിക്കേൽപ്പിച്ചു. പാലയാട്ട് മീത്തൽ അനഘ (27)യ്ക്കാണ് വെട്ടേറ്റത്. ഇന്നലെ വൈകിട്ട് അഞ്ചരയോടെയാണ് സംഭവം. സംഭവത്തിൽ ഭർത്താവ് കാർത്തികപ്പള്ളി ചെക്യോട്ടിൽ ഷനൂബിനെ വടകര പോലീസ് കസ്റ്റഡിയിലെടുത്തു.ദാമ്പത്യപ്രശ്‌നങ്ങളെ തുടർന്ന് അനഘ ഭർത്യവീട്ടിൽ നിന്നും ചെമ്മരത്തൂരിലെ സ്വന്തം വീട്ടിലേക്ക് വന്നിരുന്നു.

     ഇതിനിടെ അനഘയെ വക വരുത്തുമെന്ന് പറഞ്ഞ് കഴിഞ്ഞ ദിവസം ഷനൂബ് പലർക്കും ഓഡിയോ സന്ദേശം അയച്ചിരുന്നു. ഇതിന് പിന്നാലെയാണ് വെള്ളിയാഴ്‌ച കത്തിയും കൊടുവാളുമായി എത്തി ഇയാൾ അക്രമം നടത്തിയത്. ഇരു കൈകൾക്കും പരിക്കേറ്റ അനഘയെ വടകര ഗവ.ജില്ലാ ആശുപത്രിയിൽ പ്രവേശിപ്പിച്ചു. അനഘയെ ഷനൂബ് ഉപദ്രവിക്കുന്നത് കണ്ട് രക്ഷിക്കാൻ ശ്രമിച്ച അമ്മൂമ്മ മാതുവിന് നിസാര പരിക്കുണ്ട്. അക്രമണ ശേഷം വീടിന് സമീപത്തെ ബസ് സ്റ്റോപ്പിൽ നിൽക്കുകയായിരുന്ന ഷനൂബിനെ വടകര പോലീസ് കസ്റ്റഡിയിലെടുക്കുകയായിരുന്നു.