എൻഎച്ച് വികസന സാധനങ്ങൾ തിരിമറിക്കെതിരെയുള്ള സമരം പിൻവലിച്ചു
ആർ.ഡി.ഒ ഷാമിൽ സെബാസ്റ്റ്യൻ സ്ഥലത്തെത്തി ബന്ധപ്പെട്ടവരുമായി ചർച്ചകൾ നടത്തിയതോടെയാണ് സമരം പിൻവലിച്ചത്
പയ്യോളി: നാഷണൽ ഹൈവേ വികസനത്തിനു വേണ്ടി കൂട്ടി വെച്ച കോൺക്രീറ്റ് മിശ്രിതങ്ങൾ സ്വകാര്യ വ്യക്തിയുടെ കെട്ടിട നിർമ്മാണത്തിനായി തിരിമറി ചെയ്തതിൽ പ്രതിഷേധിച്ച് നാട്ടുകാരും രാഷ്ട്രീയപാർട്ടികളും സാംസ്കാരിക സംഘടനകളും ശക്തമായി സമര രംഗത്ത് ഇറങ്ങിയിരുന്നു.
മുൻസിപ്പൽ ചെയർമാൻ വി.കെ.അബ്ദുറഹിമാൻ, പയ്യോളി ഏരിയ സെക്രട്ടറി എം.പി.ഷിബു , സ്ഥിരം സമിതി അധ്യക്ഷൻ പി എം ഹരിദാസൻ,മുസ്ലിം ലീഗ് മുൻസിപ്പൽ സെക്രട്ടറി ബഷീർ മേലടി,ടി.ചന്തു മാസ്റ്റർ എന്നിവരാണ് കുത്തിയിരുപ്പ് സമരത്തിന് നേതൃത്വം നൽകിയത്. ബന്ധപ്പെട്ട അധികാരികൾ നേരിട്ടെത്തി വ്യക്തമായ ഉറപ്പു നൽകാതെ സമരം പിൻവലിക്കില്ലെന്ന് പറഞ്ഞായിരുന്നു സമരം.
വൈകുന്നേരം 6:00 മണി ആയതോടെ ആർ.ഡി.ഒ ഷാമിൽ സെബാസ്റ്റ്യൻ സ്ഥലത്തെത്തി ബന്ധപ്പെട്ടവരുമായി ചർച്ചകൾ നടത്തി. വഗാഡ് പ്രതിനിധികളും രംഗത്ത് ഉണ്ടായിരുന്നു. ആദ്യമൊക്കെ കശപിശയുടെ ശൈലിയിൽ ചർച്ച നീങ്ങിയെങ്കിലും ഒടുവിൽ ആർ.ഡി.ഒ യുടെ ശക്തമായ ഉറപ്പിന്റെ അടിസ്ഥാനത്തിൽ സമരം പിൻവലിക്കുകയായിരുന്നു.