കാവുംവട്ടം യു.പി. സ്കൂളിൽ "മികവുത്സവം 2024" സംഘടിപ്പിച്ചു

കൊയിലാണ്ടി: ഉപജില്ല, ജില്ലാ മേളകളിൽ സ്കൂളിന്റെ അഭിമാനമായിമാറി വിജയ തിലകമണിഞ്ഞ പ്രതിഭകൾക്കുള്ള അനുമോദനവും, നാടൻ പാട്ട് രംഗത്തെ അതുല്യ പ്രതിഭയും നാടിന്റെ അഭിമാനവുമായ ഓടപ്പുഴ പുരസ്‌കാര ജേതാവ് സജീവൻ കുതിരക്കുടയ്ക്കുള്ള ആദരവും, വിദ്യാർത്ഥികളുടെയും, രക്ഷിതാക്കളുടെയും, നാട്ടുകാരുടെയും നിറഞ്ഞ സാന്നിധ്യത്തിൽ സ്കൂൾ ഓഡിറ്റോറിയത്തിൽ നടന്നു.

     സജീവൻ കുതിരക്കുടയെ കൊയിലാണ്ടി നഗരസഭ ചെയർപേഴ്‌സൺ സുധ കിഴക്കെപ്പാട്ട് പൊന്നാടയും മൊമെന്റോയും നൽകി ആദരിച്ചു. ഉപജില്ല ശാസ്ത്രമേളയിൽ ഓവറോൾ സെക്കൻ്റ് റണ്ണറപ്പ്, ഗണിതമേള സെക്കൻ്റ് റണ്ണറപ്പ്, പ്രവൃത്തി പരിചയമേളയിൽ സെക്കൻ്റ് റണ്ണറപ്പ്, സ്കൂൾ കലാമേളയിൽ ഓവറോൾ സെക്കൻ്റ് റണ്ണറപ്പ് എന്നീ വിജയങ്ങൾ കൈവരിക്കുന്നതിൽ മുഖ്യപങ്കുവഹിച്ച കുട്ടികളെ വർണ്ണാഭമായ വേദിയിൽ കൊയിലാണ്ടി നഗരസഭ ചെയർപേഴ്‌സൺ സുധ കിഴക്കേപ്പാട്ട് സർട്ടിഫിക്കറ്റ്, മൊമെന്റോ എന്നിവ നൽകി അനുമോദിച്ചു.

      ചടങ്ങിൽ ഉപജില്ല ജില്ലാ മേളകളിൽ നൃത്ത വിഭാഗത്തിൽ കുട്ടികൾക്ക് മികച്ച പരിശീനം നൽകി വിജയം നൽകുന്നതിൽ പ്രധാന പങ്കുവഹിച്ച നിർമ്മല സ്കൂളിന്റെ ആദരവേറ്റുവാങ്ങി. മുൻസിപ്പാലിറ്റി സ്റ്റാന്റിംഗ് കമ്മിറ്റി ചെയർപേഴ്‌സൺ ഇന്ദിര അദ്ധ്യക്ഷയായി. ചടങ്ങിൽ പി.ടി.എ. പ്രസിഡന്റ് സബീഷ്, പി.ടി.എ. വൈസ് പ്രസിഡന്റ് ദിനേശൻ എന്നിവർ ആശംസകൾ അർപ്പിച്ച് സംസാരിച്ചു. കാവുംവട്ടം യു.പി. സ്കൂൾ പ്രധാനദ്ധ്യാപകൻ പ്രതീഷ് സ്വാഗതവും സ്റ്റാഫ് സെക്രട്ടറി ജീന ജി.പി. നന്ദിയും പറഞ്ഞു.