എസ്.എസ്.എല്.സി. ഫലം മെയ് 8ന്
ഹയർ സെക്കൻ്ററി, വൊക്കേഷണല് ഹയർ സെക്കൻ്ററി ഫലങ്ങൾ മെയ് 9ന് പ്രഖ്യാപിക്കും
തിരുവനന്തപുരം: സംസ്ഥാനത്തെ എസ്.എസ്.എല്.സി. പരീക്ഷാഫലം മെയ് എട്ടിന് പ്രഖ്യാപിക്കുമെന്ന് മന്ത്രി വി. ശിവന്കുട്ടി. ഹയർ സെക്കൻ്ററി, വൊക്കേഷണല് ഹയർ സെക്കൻ്ററി ഫലങ്ങൾ മെയ് 9ന് പ്രഖ്യാപിക്കും. കഴിഞ്ഞ വര്ഷത്തേക്കാള് 11 ദിവസം മുന്പാണ് ഇത്തവണത്തെ ഫല പ്രഖ്യാപനം.
ആകെ 4,27,105 വിദ്യാർത്ഥികളാണ് ഇത്തവണ എസ്.എസ്.എൽ.സി. പരീക്ഷ എഴുതിയത്. ഇതിൽ 2,17,525 ആൺകുട്ടികളും 2,09,580 പെൺകുട്ടികളും ഉൾപ്പെടുന്നു. ഏപ്രിൽ 3 മുതൽ 20 വരെ പതിനാല് ദിവസങ്ങളിലായി സംസ്ഥാനത്തൊട്ടാകെ 70 ക്യാമ്പുകളിലായി നടന്ന മൂല്യനിർണ്ണയ ക്യാമ്പിൽ 10,863 അധ്യാപകർ പങ്കെടുത്തു.
ആകെ 4,41,120 വിദ്യാർത്ഥികളാണ് ഹയർ സെക്കൻ്ററി പരീക്ഷ എഴുതിയത്. വൊക്കേഷണൽ ഹയർ സെക്കൻഡറിയിൽ റഗുലർ വിഭാഗത്തിൽ 27,798 -ഉം പ്രൈവറ്റ് വിഭാഗത്തിൽ 1,502- ഉം ഉൾപ്പെടെ ആകെ 29,300 പേരാണ് രണ്ടാം വർഷ പരീക്ഷയ്ക്ക് രജിസ്റ്റർ ചെയ്തത്.