ഗുളിക രൂപത്തില് വിഴുങ്ങി; ആഫ്രിക്കൻ സ്വദേശികളുടെ ശരീരത്തിൽ നിന്നും പുറത്തെടുത്തത് കോടികളുടെ കൊക്കെയ്ൻ
ഇതുവരെ ശരീരത്തിൽ നിന്നും കണ്ടെത്തിയത് നാല് കിലോയോളം കൊക്കെയ്ൻ
![ഗുളിക രൂപത്തില് വിഴുങ്ങി; ആഫ്രിക്കൻ സ്വദേശികളുടെ ശരീരത്തിൽ നിന്നും പുറത്തെടുത്തത് കോടികളുടെ കൊക്കെയ്ൻ ഗുളിക രൂപത്തില് വിഴുങ്ങി; ആഫ്രിക്കൻ സ്വദേശികളുടെ ശരീരത്തിൽ നിന്നും പുറത്തെടുത്തത് കോടികളുടെ കൊക്കെയ്ൻ](imglocation/upload/images/2024/Jun/2024-06-24/1719209066.webp)
നെടുമ്പാശ്ശേരി: കൊച്ചി അന്താരാഷ്ട്ര വിമാനത്താവളത്തില് പിടിയിലായ സ്ത്രീയുടെയും പുരുഷൻ്റെയും ശരീരത്തിൽ നിന്നും കണ്ടെത്തിയത് കോടികൾ വിലമതിക്കുന്ന കൊക്കെയ്ൻ. ടാന്സാനിയന് സ്വദേശികളായ ഒമരി അതുമാനി ജോങ്കോ, വെറോനിക്ക അഡ്രേഹെലം നിഡുങ്കുരു എന്നിവരെയാണ് ഡയറക്ടറേറ്റ് ഓഫ് റവന്യു ഇന്റലിജന്സ് (ഡി.ആര്.ഐ.) യൂണിറ്റ് പിടികൂടിയത്. ഗുളിക രൂപത്തില് പ്ലാസ്റ്റിക് ആവരണത്തിലാക്കി വിഴുങ്ങിയ ഗുളികകളാണ് കണ്ടെത്തിയത്.
നൂറോളം ഗുളികകളുടെ രൂപത്തില് 1.945 കിലോ കൊക്കെയിനാണ് ഒമരി അതുമാനി ജോങ്കോയുടെ ശരീരത്തില്നിന്നു കണ്ടെടുത്തത്. ഇതിന് 19 കോടി രൂപ വില വരും. വെറോനിക്കയുടെ ശരീരത്തിലും രണ്ട് കിലോയോളം കൊക്കെയിന് ഉണ്ടെന്നാണ് സൂചന. ഇതുവരെ 1.8 കിലോ പുറത്തെടുത്തെന്നാണ് വിവരം.
16-ന് എത്യോപ്യയില്നിന്ന് ദോഹ വഴി ബിസിനസ് വിസയില് കൊച്ചിയിലെത്തിയ ഇവരെ രഹസ്യവിവരത്തിൻ്റെ അടിസ്ഥാനത്തിൽ ഉദ്യോഗസ്ഥരെത്തി പരിശോധിച്ചെങ്കിലും മയക്കുമരുന്ന് കണ്ടെത്താനായില്ല. തുടർന്ന് ആശുപത്രിയിലെത്തിച്ച് എക്സ്റേ പരിശോധന നടത്തിയപ്പോഴാണ് മയക്കുമരുന്ന് കണ്ടെത്തിയത്. ഒരാഴ്ചകൊണ്ടാണ് ഒമരിയുടെ ശരീരത്തില്നിന്ന് കൊക്കെയിന് പൂര്ണമായും പുറത്തെടുത്തത്. ഗുളികകളെല്ലാം പുറത്തെടുത്ത് തീരാത്തതിനാല് വെറോനിക്ക ഇപ്പോഴും ആശുപത്രിയിലാണ്. പഴവര്ഗങ്ങള് കൂടുതലായി കഴിപ്പിച്ച് വയറിളക്കിയാണ് പുറത്തെടുക്കുന്നത്.