കോഴിക്കോട് മാവൂർ റൂട്ടിൽ സ്വകാര്യ ബസുകളുടെ മിന്നൽ സമരം; യാത്രക്കാർ വലഞ്ഞു

കോഴിക്കോട്: കോഴിക്കോട് - മാവൂർ റൂട്ടിൽ സ്വകാര്യ ബസുകളുടെ മിന്നൽ പണിമുടക്ക്. ഇന്നലെ ബസ് ജീവനക്കാരെ ഒരു സംഘം മർദിച്ചുവെന്നാരോപിച്ചാണ് സമരം. എടവണ്ണപ്പാറ, പെരുമണ്ണ, കുറ്റിക്കടവ്, മാവൂർ, ചെറുവാടി ഭാഗങ്ങളിലേക്കുള്ള ബസുകളാണ് പണിമുടക്കുന്നത്. ഇതേത്തുടർന്ന് യാത്രക്കാർ വലഞ്ഞു. 

      കോഴിക്കോട് - അരീക്കോട് റൂട്ടിലോടുന്ന സ്വകാര്യ ബസിലെ ജീവനക്കാരെ പാറമ്മലിൽ വെച്ച് ഇന്നലെ ഒരുസംഘം മർദിച്ചതായി പരാതിയുണ്ടായിരുന്നു. ജീവനക്കാരുടെ പരാതിയിൽ മാവൂർ പൊലീസ് കേസെടുത്തു. ഇന്ന് മാവൂർ പൊലീസ് സ്റ്റേഷനിൽ ബസ് ജീവനക്കാരുമായി ചർച്ച നടത്തും. ലഹരി സംഘമാണ് മാവൂർ പാറമ്മലിൽ വെച്ച് ബസ് തടഞ്ഞ് അകത്ത് കയറി കണ്ടക്ടറെയും ഡ്രൈവറെയും മർദിച്ചതെന്ന് ബസ് തൊഴിലാളികൾ പറയുന്നു. ഇതേ തുടർന്ന് ജീവനക്കാരെ ആശുപത്രിയിൽ പ്രവേശിപ്പിച്ചു.