വയനാട്ടിൽ ഹര്‍ത്താൽ ആരംഭിച്ചു; ലക്കിടിയിൽ വാഹനങ്ങൾ തടയുന്നു

കല്‍പ്പറ്റ: ചൂരൽമല- മുണ്ടക്കൈ ഉരുൾപൊട്ടൽ ദുരന്തത്തിൽ യുഡിഎഫും എൽഡിഎഫും പ്രഖ്യാപിച്ച ഹർത്താൽ വയനാട്ടിൽ തുടങ്ങി. രാവിലെ ആറു മുതൽ വൈകിട്ട് ആറു വരെയാണ് ഹർത്താൽ. വയനാട്ടിലേക്ക് പോകുന്ന വാഹനങ്ങൾ ലക്കിടിയിൽ സമരക്കാർ തടയുകയാണ്. സ്വകാര്യ വാഹനങ്ങളും ദീർഘദൂര സർവീസുകളും ലക്കിടിയിൽ തടഞ്ഞു വച്ചിട്ടുണ്ട്.

     വാഹനങ്ങൾ നിരത്തിൽ ഇറക്കാതെയും കടകളടച്ചും ഹർത്താലിനോട് സഹകരിക്കണമെന്നാണ് ഇരു മുന്നണികളുടെയും ആഹ്വാനം. കൽപ്പറ്റ, മാനന്തവാടി, സുൽത്താൻബത്തേരി മേഖലകളിലെ പോസ്റ്റ് ഓഫീസുകളിലേക്ക് രാവിലെ യുഡിഎഫ് മാർച്ച് നടത്തും. കൽപ്പറ്റ നഗരത്തിൽ അടക്കം എൽഡിഎഫിന്‍റെ പ്രതിഷേധ പ്രകടനവും നടക്കും.